【旅遊。韓國自由行D10 -- 內藏山之山中山的楓葉美景】

好耐冇見呀~呢2個星期真係好忙呀..攪到文都冇時間寫下..

廢話少說，繼續講返個韓國遊先睇到首圖就知旅程仍然繼續追楓~
今日我地出發去好出名睇楓葉的地方-- 內藏山
內藏山位於全羅北道井邑市(정읍시)去井邑除左火車仲可以搭巴士去架，不過我地怕唔識落車，所以都係揀左火車^^
係火車站同職員講去井邑(정읍)就OK，火車時間大約三小時
今次仍然係無窮花，真係又要講多次~無窮花號真係好舒服，個位又闊落，真心覺得非常好!!
前面紅色果位就係火車類別，睇清楚先好上車呀~因為井邑唔係終點站黎，所以往木浦方向出發就岩=)

木浦我下次會去搵你架啦~

例牌係火車度一定會食架紫菜卷加香蕉奶3個多鐘架火車話咁快就過啦~出左火車站要再轉巴士先到內藏山(大約20分鐘到啦)
火車站旁邊有個旅客中心，門外有貼到邊樣去巴士站搭車的；或者可以入去問D職員

真係十級好天~

都寫得好清楚
我地憑上年黎過架記憶+呢張簡易架地圖，好快就搵到巴士站(記得係坐171號巴士)
等左一陣，巴士終於到啦!成架巴士得我地2個 ( 好多人都一齊夾的士過去，係得我地2個係度等，好彩都唔係等左好耐 )
上年我地咩都冇食就去行，返番首爾果時真係餓死人呀!
所以今年吸收經驗，一落車就去食個午餐先~
揀左間有相片提供架舖頭，唔識講都可以指下呀嘛~

Mia食泡飯，我呢就食拌飯，一黎到個賣相都唔差呀...點知...
我個拌飯難食到呀...D冬菇陣味好奇怪..好似生咁樣..D野又唔熱..真係..超唔開心囉..
Mia果過比我好..起碼係熟同熱呀
就係咁..食完一餐飯但個肚就又好似咪都冇食過咁就出發行山啦
沿途行入去都有其他食店的，如果下次再去我就會揀入少少果D架啦!!

行去買票處時，見到個個韓國人都係一個樣，全身行山套裝，好PRO架
呢條路已經好靚了

買完飛就入去啦，都有D樹未變色，但咁樣都已經好好睇了!
上山架方法有3種 --- 第一搭小火車，第二搭園內巴士，第三就係自己行上去
但有人講過，係呢度搭車上去係老人家架專利，如果見到有年青人搭係會俾人鬧
而且又睇到咁長龍..算吧啦..照原定計劃係行上去啦..
其實行上去都好，起碼身體健康D呀~而且方便影相呀嘛^^
香港旅行社已經有團黎內藏山了，所以沿途都見到好多香港人，上年就真係只係聽到韓文咋

我地真係好好彩...雖然唔係全部都變晒色，不過都有8成..
而且又見到好多楓葉隧道，果一刻真係忍不住咁講 "哇~~好靚呀"!! 




成班朋友一齊係紅樹下談天說地，真係好寫意!

行下影下都玩左幾個鐘，係時候小息時間，食返個泡菜味童星點心麵先
但一D泡菜味都冇..

我地休息架位置就係搭車落山個車站旁邊，嘩!!幾多人等車
休息完之後，繼續行去今日架目的地內藏寺啦

韓國人深信將D石仔疊起，就會願望成真架啦
好可惜我地係冇咁做到架..=.=
因為我地買左6點幾的火車票，所以行到4點幾我地就掉頭行番落山LU~
係搭車架時候，就發生左一件事..令到我地差D搭唔到火車呀..
架車行到一半架時候，突然間有2個阿伯(應該年過60的)係度打架..(係真係會飛落地下果隻)
真係俾佢地嚇死..就係因為呢2個阿伯架打交..導致我們係火車開前0既2分鐘先落到車..
而落車地點與月台估計距離最少400米(包括上下樓梯)..所以...我地一落車就狂奔....認真講句除左中學PE堂之外真係冇跑過咁遠架..
仲要得個2分鐘..真係人都癲呀!!!!

好彩趕到咋..如果唔係就要等到第2朝先有火車返去呀!
上到車抖順條氣就係火車上訓著左啦
返到首爾又九點幾啦...
行左成日山，真係累到傻，買左個PIZZA加酸瓜加富貴柿就算了
嘩!!真係唔食唔知佢好味~個PIZZA同香港PIZZA完全唔同口感&味道~超級好味!!!!
而家見到呢張相，真係好想食呀!~
(位置 : 新村GRANDMART超市B1果層，收銀旁邊，誠意推介!!!)

待續