❤ 大Ka．Mia 復活節暴飲暴食@吉隆坡 day 2.2 ❤

真係拖左好耐了，成三個月先再update!


大Ka．Mia包左車瓜拉雪蘭莪螢火蟲之旅，

行程係丹絨士拔小漁村 - 瓜雪皇家山金絲猴、老鷹、螢火蟲......

 

呢一日完全係一個食到爆肚既旅程，

今次包車既司機叫阿義，係馬來西亞既華人，

一口流利既廣東話，溝通實在太方便了!

阿義用既係七人車，放埋行李之後，
大Ka．Mia仲坐得好舒服! 

第一站就係丹絨士拔小漁村，

呢個小漁村即係吉隆坡(KL)既近郊，

阿義話一到假日都有好多KL市民都會過黎玩! 

好似香港人去新界大嶼山玩甘樣，

其實丹絨士拔小漁村係一個以前係個窮既華人社區，

就係靠自己既努力令窮社區變成而家呢個小旅遊區，

阿義帶大Ka．Mia到左丹絨士拔小漁村內既木薯片廠，

講真廠內既衛生環境好麻麻，

未製既木薯有超級多烏蠅，連相都唔想影，

Mia覺得有90%既人係睇到都唔會敢食d薯片!

賣場既每一款薯片都有得試食，

完全無人理你亦無人sell你，

想食邊樽就打開個樽試食，

阿義話好食嫁試下了佢就係甘一塊接一塊甘食，

大Ka．Mia覺得木薯又焗又炸之後應該唔怕掛，

要試下咩味既!應該唔會死既!(好似係MYR 10有3包)

d其實薯片食落味道唔錯，

係比平時食開果d硬少少，

干辣同咖哩都幾好，

最尾一包係好似蝦片甘既原味質地係(林)少少，最好味!

買完之後又上車了去一個地方，

一望無際既沙灘，不過個沙灘唔適合游水，

只係睇得唔游得，

有漁民係沙灘上捉蟹!

 

成個沙灘都係呢D蟹，數量多到得人驚，

 沙灘旁有間幾出名既餐廳，

餐廳將沙灘上既蟹炸左佢就賣比食客，

不過多數都比旅行團包晒!

 不過大Ka．Mia唔係黎食海鮮，係黎睇出名既情人橋，

好可惜既係條石屎做既橋竟然塌左!

阿義話以前舊既用木做既橋都無事，

但用石屎番新之後就塌左，總之就係黑仔呀!
一場黎到都係睇斷橋，一定要讚一讚既係阿義影相唔錯嫁!

有佢幫手影相完全唔洗擔心! 有板睇既!

係情人橋既路口，

大Ka．Mia買左阿義推介好味又衛生既100%純果汁，

好似MYR 5一支(MYR 1約港幣 2.6)，

原本唔敢買既怕唔乾淨同唔新鮮都唔知放左幾耐，

但阿義話佢地流量好快而且賣唔晒既就倒唔會留過夜，

大Ka．Mia就信佢又死就死了，

一支係紅色火龍果汁一支係百香果汁，

一飲就知完全無加水，仲有少少年(杰)，

紅色火龍果汁就少少甜，而百香果汁就甜中帶酸，

呢一個只係暴飲暴食既開始，

係丹絨士拔小漁村好出名既丹絨士拔手工海南包本店，

大Ka．Mia見其他遊客係幾十個甘買好誇張!

一共有六款包比大家選，

佢地成部機係店內即做包，

由機械整好左d麵粉，人手包函，

密密做無停手，但都唔夠d客買得快!

一個個包放晒係架等入蒸籠，

本身大Ka．Mia就好想試下加央包，

但未有貨甘唯有要生肉包同花生包，

生肉包一拎上手已經好重手，

原來除左肉之外仲有半隻雞蛋係裡面，

甘足料食一個包都飽晒!

係甘既阿義請大Ka．Mia去左手工包對面既小食店食地道小食，

原來小食店都係由手工包老闆開既!

阿義見天氣熱一坐底就叫左杯黑咖啡比大家消暑先，

呢杯馬拉風味咖啡好味到真係唔知點形容，

開頭仲以為係無奶既齋啡，

原來有奶既仲係用黑白淡奶沖嫁，

但香港搵唔番呢種味!即使係話馬拉咖啡都唔係呢種味!

但阿義話呢杯既水準只屬一般，

有無甘幸福呀!馬拉食既野都甘好味!

唔係圓形既炸魚蛋，

明顯係新鮮炸唔係萬年魚蛋，一個字好味!

仲有炸雞同炸魔鬼魚，

雞同魚都甘滑，魔鬼魚係完全唔腥!

其實最好味既係個辣醬令全部小食都加晒分!

跟住上車前經過生果檔見到Mia最鐘意既菠蘿，
又好想食了!細細個好似MYR 2一個，

 

大Ka．Mia一不做二不休食左先算了!

又一袋菠蘿一袋西瓜(MYR 10 有3袋)，

西瓜好味，菠蘿係無得彈，

唔洗浸監水都係甘好味又唔(na)脷，

識食既一定會係馬拉食熱帶水果，無得輸!

數一數先由早餐開始，只係短短兩個鐘內就食左

跟住食左果汁、木薯片、手工包、炸野、生果!

食到好飽呀!

待續......