【2013初夏變黑遊台灣D2。墾丁、龜山、萬里桐、恆春大街、龍磐公園、東港】(上)

第二日一早就起身啦~因為只有半日時間係墾丁，要把握時間GoGoGo..~
一早攪好晒野..收拾好行李就係到等今日有我地遊墾丁既包車司機~
等左一輪先知今日個包車司機原來係民宿老闆,..
其實民宿有送早餐劵的，但好可惜因為都有一段距離需渣車去，
但大家都知我地係唔識渣車架啦~所以都預左冇得食架啦~
點知...

民宿老闆買埋早餐過黎俾我地呀~~感動!

南部同北部的蛋餅好唔同..我個人鍾意北部多D~
食完早餐就出發去今日第1站 -- 龜山
呢個地方係民宿老闆推介的，原因係因為呢到冇咩人，景色好靚
而事實上，我都係到成個鐘又真係一個人都冇喎(除左我地3個之外)
因為要睇靚景，所以要行上山先..
好在龜山唔算太高..如果唔係大熱天時去行山，我驚自己會昏倒..
行左十幾公鐘就已經到頂啦~
嘩~一望無際既大海..加上好天氣，行上黎係值得架~

係度玩左半個鐘左右就走啦..
冇瓦遮頭，放隻蛋係個頭度都會熟呀~

上落山條路係一樣架~兩旁都係草~感覺上個人變得好健康~
又出發去第二站啦~

去萬里桐中經過一個海邊小公園(唔記得左叫咩名)
又係冇人架..大Ka同Mia就去影下相..
雖然好晒..但陣陣海風吹過黎都好舒服..不過仍然係熱..TT

海水好清好藍..好靚

個真係好晒...我隻眼係完全開唔到...


係度影左一陣就去萬里桐啦..
萬里桐係一個浮潛熱點..但大Ka同Mia就冇係度浮啦..我地揀左去第二度浮...

但唔浮都要落下水..浸一浸腳,..幫個人消消暑

 

係個海度影左一輪..轉移陣地..
去影石灘..


呢條石壆係海角7號其中一幕架場景地黎架..
前幾年仲HIT緊海角時..呢度都好多人黎影架..(資料來源係我地個導遊)
石壆旁仲有條石級俾人行落去..我地就冇行啦..坐係度同D石影下就算..

係度影到個導遊都頂唔住要食飯先..
但我地真係完全冇胃口食..所以我地係度吹吹海風繼續影相等佢食飽先再出發..
下一次就出發去恆春大街啦~
途經白沙灣，我地又落去行下..

天氣好真係好唔同..影出黎D相真係靚D

少年PI就係度取景架啦

對住個海..吹住海風..飲埋杯凍冰冰架沙冰
真係夏天一大樂事..
抖左一陣就去恆春大街..
恆春大街真係冇咩野行..除非你係海角FANS啦..
因為主角屋企就係住係呢度..
而我地今次黎係去食呢家綠豆饌

雖然望落去個樣唔太吸引,但又幾好味
而且都好飽肚架..
黎呢度都要去一去阿嘉之家..
而家屋前係俾人寫明信片的..
我地當然都有寫啦~

阿嘉之家係可以入架..不過唔記得要俾幾錢入場費了

因為老街真係冇咩野行..所以我地好快就走啦..



待續